Мукаммал ва мувозанатли овқатланиш
Иммунитет самарали ишлаши учун турли витамин ва минералларга бой озиқ-овқатларни истеъмол қилиш зарур. Хусусан, C витамини (цитрус мевалар, қизил ва яшил булғор қалампири, қовун, брокколи), D витамини (сут маҳсулотлари, тухум, қўзиқорин) ва рух (қовоқ уруғи, мол жигари, ловия, тухум сариғи, бодом) мўл бўлган маҳсулотлар таомномадан мустаҳкам ўрин эгаллаши керак.
Етарли миқдорда уйқу
Иммунитет тизимининг тўғри ишлаши учун етарли миқдорда ухлаш жуда муҳим. Катта ёшли инсонлар учун бир суткада 7-8 соат уйқу тавсия этилади. Тиниқиб ухлаш орқали организм вирус ва бактерияларга қарши самаралироқ курашади.
Жисмоний фаоллик
Жисмоний машқлар иммунитетни мустаҳкамлашнинг яна бир муҳим йўли. Мунтазам равишда жисмоний машғулотларни бажариш организмнинг инфекцияларга қарши курашиш қобилиятини оширади ва барча тизимларнинг яхши ишлашини таъминлайди.
Стрессни камайтириш
Кўплаб изланишлар стресснинг иммунитет тизимига салбий таъсир кўрсатишини исботлаган. Уни камайтириш орқали организмнинг инфекцияларга қарши курашувчанлик қобилиятини яхшилаш мумкин. Стрессга қарши мустаҳкам туришнинг самарали йўлларидан бири медитация қилиш, нафас олиш машқлари ва спорт билан шуғулланишдир.
Етарлича суюқлик ичиш
Суюқлик ичиш организм фаолиятини қўллаб-қувватлаш учун жуда зарур. Чунки инфекцияларга қарши самарали курашишда тананинг гидрация ҳолати юқори даражада бўлиши лозим. Бу — сув, табиий шарбатлар ва турли витаминга бой шўрвалар орқали амалга оширилиши мумкин.
Қўшимча витамин ва минераллар
Агар рационда турли витаминлар етишмаса, уларни қўшимча тарзда қабул қилиш мумкин. Айниқса, С, D витамини ва рух иммунитет тизимини қувватлантиришга ёрдам беради.
Қўлни мунтазам ювиш
Қўл гигиенаси инфекция тарқатмасликнинг энг самарали йўлларидан бири. Уларни мунтазам ювиш орқали организмга вирус ва бактериялар киришининг олдини олиш мумкин.