Шифохонанинг жонлантириш бўлимига ётқизилган 31 ёшли эркакда бир неча бор юрак фаолиятини тиклаш муолажалари ўтказилди. Кетма-кет уринишлар самара бермагач, унда ўлим ҳолати қайд этилиб, ўликхонага юборилди.
Воқеа қаҳрамони спиртли ичимликни кўп ичиши оқибатида аҳоли гавжум кўчалардан бирида хушидан кетган эди. Кейин уни йўловчилар шифохонага олиб келишган. Тиббиёт ходимлари хушига келтира олмагач, кўп алкоголь қабул қилиш оқибатида вафот этган, деган хулоса билан ўликхонага юборилган.
Бироз вақт ўтгач ўликхона қоровули совиткичли камера томондан келаётган инграш ва тақиллаган товушни эшитган. У бундан даҳшатга тушиб, қўрқиб кетган. Сўнг камерага кириб қараса яқинда олиб келинган мурда тирилибди. У ўзига иссиқроқ кўрпа беришни илтимос қиларди…
Қоровул “Тез ёрдам” ва полицияни чақирган. “Тирилган мурда” полициячиларга кўрсатма бериб, кетишга чоғланган. Аммо шифокорлар унинг назоратда бўлиши кераклигини таъкидлаган. Бироқ у тўйга бориши кераклигини, қолаверса энди бир ўлимдан қолганини ҳам ювиши кераклигини айтган. Кейин ҳеч нарса бўлмагандек такси тўхтатиб, ўз йўлига равона бўлган.