Жорий йилнинг апрель ойида Андижон туманидаги Хартум қишлоғида йилига 10 миллион флакон инсулин дори воситаси ишлаб чиқариш қувватига эга завод иш бошлаган эди. Айни пайтда бу ерда Соғлиқни сақлаш вазирлиги, Фармацевтика тармоғини ривожлантириш агентлиги ҳамда «Zamin Bio Health» МЧЖ билан ҳамкорликда қандли диабет касаллигини даволашда қўлланиладиган «Инсулин» препарати ишлаб чиқариш бўйича йирик инвестицион лойиҳа амалга оширилмоқда.
Маълумки, қандли диабет хасталиги инсулин гормонининг тўлиқ ёки қисман етишмовчилигидан келиб чиқади. Натижада, қонда гипергликемия – қондаги глюкоза миқдорининг давомли ортиб бориши кузатилади. Касаллик сурункали давом этиши ва организмдаги моддалар алмашинув жараёнларининг (углевод, ёғ, оқсил, минерал ва сув-туз алмашинуви) бузилиши билан намоён бўлади.
Ушбу касалликка даво сифатида мамлакатимизда ишлаб чиқарилаётган дори воситасини сифатли, халқаро талаблар даражасида тайёрлаш бўйича зарур бўлган клиник тадқиқот ишлари муваффақиятли якунланди. 3 хил кўринишга эга бўлган «Juslin Н», «Juslin R», «Juslin 30/70» инсулин препаратлари тадқиқот давомида беморларда ижобий натижа кўрсатди.
Куни кеча Соғлиқни сақлаш вазирлиги томонидан ушбу препаратлар давлат рўйхатидан ўтказилиб, тиббиёт амалиётида қўлланилишга рухсат этилди.
Шу пайтга қадар инсулин дори воситаси юртимизга четдан келтириларди. Завод ишга тушиши натижасида ишлаб чиқарилаётган маҳсулотларнинг 30 фоизи мамлакатимиз ички бозори талабини қоплашга йўналтирилади. Бу эса дори воситасининг импорт ҳажми камайишига, экспорт имконияти кенгайтиб, таннархи арзонлашишига олиб келади.
Ўхшаш хабарлар
-
Пиротехника буюмлари савдоси қонунга хилоф
-
Сунъий интеллект келажаги ва глобал интеграция
-
Креатив таълим ва инновация – Янги Ўзбекистон тараққиётининг асоси
-
Ўзбекистонда маданий мерос ҳафталиги старт олди
-
Turkiyaning noqonuniy migratsiya va yuzaga kelishi mumkin bo’lgan gumanitar fojeaga qarshi kurashi