Саволга қулоқ, томоқ ва бурун шифокори Ражаббиби ХЎЖАЕВА жавоб берди
— Ёшим 35 да. Ҳар куз-қиш мавсумида томоқ оғриғи (ангина) қўзғаб азоб беради. Бу сурункали тус олган. Бу хасталикдан бутунлай қутулишнинг чораси борми? Ёки бодомсимон безларни операция қилдириб, олдириб ташлаш керакми?
Улуғбек, Оҳангарон шаҳри
— Одамлар орасида бодомсимон безларда яллиғланиш бўлса, уларни олдириб ташлаш керак, деган қараш бор. Аммо шифокор сифатида бизнинг фикримиз қуйидагича: агар қатъий кўрсатма бўлса, албатта, бодомсимон безларни олиб ташлаш керак. Буйраклар, юрак ва бўғимлар каби инсон ҳаёти учун муҳим аъзолар ва тизимлардаги асоратларнинг мавжудлиги бодомсимон безларни олиб ташлаш учун кўрсатма бўла олади.
Агар бундай асоратлар ҳали пайдо бўлмаган бўлса, унда, бодомсимон безларни олиб ташлашнинг ҳожати йўқ. Бу безлар организмдаги муҳим иммунитет аъзоси саналади ва шунинг учун имкон қадар улардаги яллиғланишни даволаш керак.
Гулшан тайёрлади