Импортга тўсиқ қўймасдан, соғлом рақобатга муҳит яратиш тўғри эмасми?

Ахборот ва оммавий коммуникациялар агентлигида бўлиб ўтган мулоқотда Ўзбекистон Республикаси Иқтисодиёт ва саноат вазирлиги вакили шу фикрни билдирди.

Ушбу тадбирда “Саноат кооперациясини янада ривожлантириш ва талаб юқори бўлган маҳсулотлар ишлаб чиқаришни кенгайтириш чора-тадбирлари тўғрисида” 2019 йил 1 майдаги Президент қарори ижроси доирасида амалга оширилаётган ишлар юзасидан маълумот берилди, дея хабар беради агентликнинг телеграмдаги каналида.

Мулоқот давомида вазирлик ҳузурида электрон кооперация биржа портали платформаси жорий этилиши маълум қилинди. Янги платформа орқали харидорлар буюртмаси доирасида эркин рақобат ва нарх шаффофлиги таъминланади.

Тадбирда ўзимизда ишлаб чиқарилиши тавсия этиладиган, иқтисодиётда талаб юқори бўлган тайёр маҳсулот ва хомашёларнинг 99 тури бўйича бўйича лойиҳалар ишлаб чиқилгани қайд этилди.

Тадбирда Дарё.уз сайти мухбири Мусулмонбек Иброҳимов: “Маиший техника воситаларини ишлаб чиқаришни маҳаллийлаштириш ва импорт маҳсулотларига қўйиладиган божларни ошириш туфайли юртимизда маҳсулот ишлаб чиқарувчиларга монополияга йўл очиб бермаяпмизми?” деган саволни ўртага ташлади.

“Маиший техника тайёр маҳсулотлари учун импорт божини “нол” қилиб қўйсак, шу соҳани ривожлантираман деб Ўзбекистонга қайси инвестор келади? — дея саволга савол билан жавоб қайтарди вазирлик бошқарма бошлиғи Фазлиддин Рўзиев. — Агар биз импортни очиб қўйсак, хориждан тайёр маҳсулот олиб келинаверса, валютамиз четга чиқиб кетаверса, шу тўғрими? Бунда қайси салоҳиятли сармоядор келиб, мамлакатимизда ишлаб чиқариш ташкил қилади? 10 йил олдин Ўзбекистонда маиший техника воситалари ишлаб чиқарадиган битта “Artel” компанияси бор эди. Ҳозирга қадар юртбошимиз томонидан тадбиркорларни қўллаб-қувватлаш бўйича қанча қарорлар чиқарилди, чора-тадбирлар белгиланди. Шунинг натижасида ички бозорнинг 50 фоизини маиший техника билан қамраб олдик. Айнан маиший техника маҳсулотларини энди экспорт учун ҳам ишлаб чиқаряпмиз. Бундай турдаги товарларимиз Россия, Тожикистон, Қирғизистон, Туркманистонга экспорт қилиняпти. Ҳатто ўзимизнинг тадбиркорлар ўша давлатларда ишлаб чиқариш корхоналари ташкил қиляпти. Агар импорт божини “нол” қилиб қўйсак, бизда аҳвол яхши бўлмайди”.

Мухбир фикрини мисол асосида тушунтиришга ҳаракат қилди: “Фуқароларимиз Қозоғистонга чиқиб, 200 минг сўмга техника сотиб олиб келгани яхшими ёки ўзимизда чиқарилган маҳсулотларни 500 минг сўмга харид қилгани яхшими, Ўзбекистонга инвесторлар келсин деб аҳоли учун қийинчилик яратиш тўғрими? Қайси бирини фойдалироқ деб ҳисоблайсиз? Инвестиция киритилишидан мақсад ҳам аслида халқ манфаатини кўзлаш эмасми? Юртимиз аҳолиси арзонроқ ва сифатлироқ маҳсулотдан фойдаланса, бунинг нимаси ёмон? Масалан, ўша “Artel”нинг маиший техника маҳсулотлари ўзимизда 500 минг сўмга сотилаётган бўлса, Қозоғистонда 300-400 мингдан сотилмоқда, нархлар 100-200 минг сўмга фарқ қилади. Шунинг учун чегара постлари очилганда жуда кўп фуқароларимиз Қозоғистонга чиқиб, маҳсулот олиб келишни бошлади. Лекин шунга ҳам тўсиқ қўйилди, харид мақсадида ойига фақат бир марта чиқиб келиш ёки муайян қийматдан ошмаслиги шарт, деган нормалар жорий қилинди. Яъни, аҳолининг арзонроқ маҳсулотдан фойдаланишига тўсиқ қўйилди. Бизга нима керак: арзон маҳсулотми ё инвесторми?”

Иқтисод ва саноат вазирлиги вакили кўтарилган масалага, вазиятга ўз муносабатини билдирди.

“Биринчи марта чегаралар очилганда одамлар Қозоғистонда маҳсулотлар худди текин, арзон деб ўйлади-да, олиб келаверди, — деди Фазлиддин Рўзиев. — Лекин ҳозирги ҳолат билан солиштириб кўриш мумкин, бугунги кунда ўзимизнинг маҳсулотлар сифат ва нарх жиҳатидан қўшни давлатлардаги билан тенглашди. Агар биз маҳаллий ишлаб чиқарувчини қўллаб-қувватлаб, нарх сиёсатини назорат қилиб, ишлаб чиқариш параметрларига эътибор берсак, талаб қўйсак, бу эртага, албатта, ўз мевасини беради. Агар сиз айтгандай, аҳолига арзон бўлсин деб иморт божини бекор қилсак, бу иқтисодий нуқтаи назардан бу яхшиликка олиб келмайди”.

Бизнинг фикримизча, ҳали республикада ишлаб чиқарилаётган кўп маҳсулотлар сифати, чидамлилиги харидорлар талабига жавоб бермайди. Уларнинг сифати тобора яхшиланиб бориши учун импорт божини бекор қилиш шарт эмас, аслида рақобат муҳитини яратишда божларни камайтириб, ўзимиздаги маҳсулотлар нархи билан мувофиқлаштиришнинг ўзи етарли. Шунда ўзимизда ишлаб чиқарилган маҳсулотлар нархи асоссиз оширилиши ва спикуляция ривожланишига чек қўйилади. Ҳамюртларимиз сифатсиз маҳсулотни қиммат нарҳда сотиб олишга мажбур бўлмайди.

Диққат! Агар сиз сайтда хатоликларни аниқласангиз, уларни белгилаб Ctrl+Enterтугмасини босинг.

Сообщить об опечатке

Текст, который будет отправлен нашим редакторам: